الخصوصية

آخر تحديث: أكتوبر 2026

حرف برنامج بيشوف الزراير اللي بتدوسها علشان يعرف الكلمة اتكتبت على الكيبورد الصح ولا لأ. ده معناه إنه شايف حاجات حساسة، فالصفحة دي بتقولك بالظبط بيعمل إيه بيها.

اللي بتكتبه

• كل اللي بتكتبه بيتعالج على جهازك وبس. حرف مش بيبعت أي كلمة بتكتبها لأي سيرفر، ولا لينا.
• خانات الباسورد macOS نفسه بيقفلها على أي برنامج، وحرف منهم.
• حرف بيحفظ على جهازك الكلمات اللي اتعلّمها منك (عدد مرات استخدامها، والكلمات اللي علّمته يحوّلها أو ميحوّلهاش)، في ملف واحد في ~/Library/Application Support/Harf. تقدر تمسحه من الإعدادات ← التعلّم.

اللي بيوصل للسيرفر بتاعنا

• التجربة والتفعيل: كود مشفّر بيميّز جهازك (مش الرقم الحقيقي بتاع الجهاز، وماينفعش يترجع له)، واسم الجهاز اللي بيظهرلك في صفحة حسابك، والرخصة.
• الشراء: اسمك، وإيميلك، ورقم موبايلك لو كتبته، والاسم أو الرقم اللي حوّلت منه، وصورة التحويل لو رفعتها.
• بنستخدم الحاجات دي علشان نبعتلك الرخصة، ونراجع التحويل، ونمنع مشاركة الرخص. مش بنبيعها ولا بنديها لحد.

بيانات الاستخدام المجهولة

لو سايب «ساعدنا نحسّن حرف» شغّال (تقدر تقفله من إعدادات البرنامج في أي وقت)، حرف بيبعت مرة في اليوم إشارة صغيرة فيها: الكود المشفّر للجهاز، ونسخة البرنامج، وهل انت في التجربة ولا مشتري، وأرقام بس: كام كلمة اتحوّلت، وكام مرة رجّعت تحويل، وكام مرة استخدمت الاختصار. مفيش أي كلمة من اللي بتكتبها، ولا اسم أي أبلكيشن. بنستخدم الأرقام دي علشان نعرف حرف بيساعد الناس فعلًا ولا لأ، ونحسّن الموديل.

قياس الإعلانات (Meta Pixel)

لو وافقت على البانر اللي بيظهر في الموقع، الموقع بيستخدم Meta Pixel علشان نعرف مين جه من إعلاناتنا ومين اشترى. ولما بتشتري، بنبعت لـ Meta إن عملية شراء حصلت ومبلغها، ومعاها إيميلك ورقمك واسمك الأول بعد ما يتحوّلوا لأكواد مشفّرة (hash) متتقريش. ده بيحصل من الموقع بس، والبرنامج نفسه مش بيبعت حاجة لـ Meta. ولو دوست «لأ شكرًا»، مفيش أي حاجة من دي بتحصل.

خدمات بنستخدمها

الموقع شغّال على Cloudflare، والإيميلات بتتبعت عن طريق Resend. الخدمتين دول بيشوفوا البيانات اللي لازمة علشان يشتغلوا بس.

مسح بياناتك

ابعتلنا من الإيميل اللي اشتريت بيه، وهنمسح بياناتك من عندنا، ما عدا اللي القانون بيلزمنا نحتفظ بيه من سجلات البيع.